Foi a primeira e única vez na que o mosquetón Mauser de Benigno Andrade abandonou a vitrina do Museo Histórico Militar da Coruña. O xornalista, escritor e activista cultural Manuel Gago, alma mater de Galicia 100, fixo unhas cantas visitas guiadas e ao pouco tempo decatouse dun feito: cada vez chegaban grupos e máis grupos de xente procedentes de contextos rurais que ficaban parados tempo e tempo diante da vitrina onde se exhibía o mosquetón de Foucellas. É máis, moitos deles acudían á exposición coa finalidade últimas de ver aquela arma que ligaba lembranzas familiares e contos que remitían á resistencia e á solidariedade labrega de antano, afirma o arqueólogo Xurxo Ayán. Foi un dos conferenciantes nas Xornadas sobre a Federación de guerrillas de León - Galicia, celebradas en Carucedo o 10 e 11 de decembro de 2022.