O alcalde de Fene, Juventino Trigo, felicitou aos traballadores municipais e á concelleira de Servizos e Seguridade polo traballo e as medidas tomadas para limitar os danos que puidera ocasionar a forte borrasca que azoutou Galicia nas últimas horas. “Non é traballo dun día, desde o verán estanse facendo limpezas”, apuntou a concelleira. Permui indicou que non houbo problemas maiores dalgunha balsa de auga nalgunha estrada. Durante a noite estableceuse un retén para vixiar a situación. “O río vai xusto”, sinalou a concelleira que destacou a importancia dos traballos de limpeza realizados no curso do río Cádavo nos terreos que comprou recentemente o Concello en Perlío.

No resto de Galicia si causou destrozos Kirk, por fortuna sen danos persoais, como o derrubamento da parede dun pavillón deportivo dun centro educativo de Porto do Son, o desprendemento do falso teito da entrada doutro colexio en Monforte e a caída dunha árbore que impedía o acceso a outro centro de Redondela.  Tamén a caída da cuberta do conservatorio de música e o desprendemento de partes dun edificio na Rúa Preguntoiro, en Santiago de Compostela. Algo semellante ocorreu en Vilagarcía de Arousa ou en Vigo, onde houbo desprendementos de elementos de cubertas e revestimentos. Tamén en Cerdedo-Cotobade e en Mos, senllas persoas que ían circulando co seu vehículo foron sorprendidas por senllas árbores que se lles viñeron enriba.