"Non logramos entender cales poden ser os motivos polos que un sacerdote, nun Estado de Dereito, non pode compatibilizar o seu labor de lexítima representación dos veciños coa tarefa de sacerdote". Así reza a queixa remitida polo secretario de Organización do PsdeG, Pablo García, ao bispo da diocese de Tui-Vigo, Luís Quinteiro Fiúza, quen se encarga tamén da sé vacante de Ourense, e á que tivo acceso a axencia Europa Press.

O número dous da organización socialista acode así en defensa dos dereitos civís do párroco Antonio Fernández Blanco quen, integrando a lista dese partido, obtivera acta de edil no municipio de A Gudiña. Porén, tras confirmarse a investidura, a dirección eclesiástica suspendeuno das súas funcións sacerdotais até que acreditase a renuncia a o posto de concelleiro. Fernández Blanco acatou a sanción e rectificou, porén o Bispado aínda non o reincorporou á fronte das catro parroquias do concello de Piñor que administra. Os seus fregueses veñen de crear unha plataforma de protesta e anunciaron que non volverán a misa até que volva o párroco, un dos poucos que defenden da Teoloxía da Liberación na provincia ourensá.

Na súa misiva ao bispo, Pablo García defende que o exercicio da política permitiríalle ao cura "buscar mellor calidade de vida e maior e mellor benestar das familias do municipio", polo que require unha explicación das causas do veto imposto ao membro da súa lista na Gudiña. Ademais, o Partido Socialista tamén denuncia un agravio comparativo respecto aos privilexios que as altas instancias da Igrexa concederon a outros sacerdotes da provincia de Ourense que fixeran campaña para o Partido Popular. No caso do cura Julio Rodríguez, permitíuselle ocupar unha concellería e mesmo o cargo de voceiro do PP en Castrelo do Val durante a década dos 90.