O líder do comité local dos socialistas vilalbeses e Delegado Provincial da Consellería de Medio Ambiente, Eduardo Vidal Baamonde, e Sonia Verdes, número catro por Lugo das listas do PSdeG ao Parlamento de Galicia, xunto con outros membros do PSOE vilalbés, foron os encargados de comunicarlle á xente o programa político do seu partido, ademais de distribuír material gráfico onde se amosaban as principais liñas de goberno para os próximos catro anos.

Para Baamonde esta iniciativa “é unha forma de participar e que a xente nos vexa na rúa moitos máis días”. Para o responsable local do partido, a Campaña Porta a Porta permite “palpar a opinión da xente e que así nos poidan transmitir as súas inquedanzas”.

Pola súa banda, Sonia Verdes considerou que este tipo de accións contribúen a “contactar máis coa xente para poder tratar de achegar as nosas propostas, aquilo que levamos feito e o que vamos a facer, sen esquecer que nos conten os seus problemas e todas as demandas que necesiten”.