“O leite materno é máis ecolóxico e tamén máis barato. É o que o bebé espera”. “A mellor opción”, destaca a matrona de Ortigueira Sonia Durán. Dar o peito estreita o vínculo entre nai e bebé que pecha o círculo aberto co embarazo. “Veñen con moitas dúbidas e hai moitos mitos en torno á lactancia materna”, indica a matrona do Sergas. “Hai unha falta xeral de confianza nos nosos corpos, a maioría de mulleres veñen con desconfianza, cando se trata dun proceso fisiolóxico como respirar”. Seis meses é o tempo mínimo recomendado de lactancia materna, a partir de aí debe irse combinando con outros alimentos e pode durar ata os dous anos ou máis. Informarse, ir aos grupos de preparación ao parto e ter alguén de referencia con quen falar. Pode ser o grupo de lactancia Bbtta, que ten a súa sede en Narón. Son os principais consellos para as futuras nais.