Esta nova imaxe foi posible gracias ao convenio de esponsorización que o Rácing renovou con Lactalis e que incluía a rotulación do autobús. O documento, esencial para que o conxunto vilalbés puidese participar na 3ª división de fútbol e consolidar así o ascenso gañado nos terreos de xogo, terá unha vixencia de catro anos, ata o 2013.

Foi unha empresa vilalbesa, Inker, a encargada de levar adiante os traballos de creación e instalación da rotulación.

O presidente do club, José Antonio Pita, estableceu que o que se pretende con esta acción é “dar a coñecer Vilalba por toda Galicia, sobre todo este ano que estamos en 3ª división, o que nos permitirá estar nas 4 provincias galegas”.

Pola súa banda, o director comercial de Autos Llano, Ramón Fernández, destacou que o Rácing será “un dos primeiros clubs galegos que vai ter un autobús desta categoría, ben rotulado e coa imaxe da súa vila e do seu patrocinador na carrozaría”.

O alcalde de Vilalba, Gerardo Criado, como fiel seguidor, tampouco se quixo perder a cita e afirmou que o Rácing, “como institución  moi representativa do noso pobo permitirá amosar, gracias a este ómnibus, a imaxe do seu esponsor e da propia vila, xa que será unha pequena embaixada todos os domingos, cando xogue polos campos galegos”. Para o edil popular “este é un salto cualitativo importante na calidade do propio club”.

Criado aproveitou a ocasión para loubar a traxectoria da directiva, á que cualificou como “extraordinaria”, sobre todo cando é unha labor “pouco agradecida”. Para o alcalde “non foi casualidade o ascenso a 3ª, senón que é gracias a  xestións coma esta o que nos permitirá ser unha referencia nos desprazamentos”.