2 de xullo de 1747. Tres barcos de guerra ingleses prendéronlle lume a unha flota de cargueiros españois que transportaba madeira e ferro de Vizcaya a Ferrol. Por se fora pouco, desembarcaron vinte soldados ingleses na praia de Sorreiras, arrasaron a batería de Sarridal, marcharon monte arriba ata a ermida de Santo Antonio de Corveiro e levaron o que puideron, incluída a imaxe do santo. Tras o susto, os habitantes de Cedeira pedíronlle ao rei, Fernando VI, unha fortificación que defendera a súa ría. Por unha vez, fixéronlles caso. Nove mil reais e cinco meses despois o castelo estaba construído, contounos Estefanía Purriños.

Pasado e presente

O Castelo da Concepción estivo ocupado ata mediados do século XIX. “Nos anos de maior actividade chegou a ter ata 15 canóns e uns 30 homes”, destacou a guía turística. Nos 70 do século XX mercouno o Concello de Cedeira, dúas décadas despois foi restaurado e creouse un centro de interpretación onde poderemos ver reproducións de navíos, réplicas de traxes de soldados, armas empregadas nas batallas, etc. Pódese visitar na Semana Santa e verán, inda que convén chamar á oficina de turismo para confirmar a apertura e os horarios, así como se é para un grupo tamén se poden concertar as visitas. A entrada e de balde, informou Estefanía Purriños.