Con este punto de partida Alberto Prado e Sergio Vallejo, dous DJ’s coruñeses, uníronse para achegarnos unha proposta musical que está a contar co éxito do público máis novo, o proxecto Galician Army, un exército de dous que move a moita xente. 

Coñecéronse nun concurso de DJ´s na Coruña e déronse conta que as súas seleccións musicais eran moi  semellantes, dese descubrimento a poñerse a traballar xuntos non mediou nada e cadraron á perfección para achegarse a un proxecto musical que medra dende a remestura de temas de autores máis que coñecidos a empezar a facer composición plena. 

Levar as pezas e as voces, “nós non sabemos cantar” din a coro, de temas xa clásicos como o de Luar na Lubre ou Xoel López, remesturalos e achegalos ás novas xeracións é a marca da casa, cunha música que navega dentro do son electrónico experimental e sintetizadores que lembran a música electrónica dos anos 80, mesturas de distintas xeracións que non chocan nin entran en conflito. 

Para “Nós” o primeiro longa duración de Galician Army, editado no 2023, contaron coa complicidade dos autores das pezas remesturadas, ata o extremo de que algún deles amosouse disposto a gravar as voces novamente para que encaixaran mellor na proposta de Alberto e Sergio. A resposta destes artistas foi fabulosa, Fillas de Cassandra, Xosé Lois Romero, Xoel López, etc, participaron nesta arriscada e exitosa proposta, mesmo vindo duns “recen chegados”. 

Fotografía: Lorena Teijeiro