O alcalde de Fene informou da finalización das obras de mellora de viais en Maniños financiadas con fondos do POS 2022 da Deputación. Actuacións moi demandadas pola veciñanza que foron recepcionadas a semana pasada. As melloras executáronse na Rúa, no Camiño da Garita e na rúa Beiramar.

Preocupación nos concellos galegos polas taxas impostas por Augas de Galicia pola xestión das depuradoras. A Fene quere cobrarlle 97.000 euros por un cuadrimestre e máis de 100.000 polo seguinte. Os concellos recorreron e paralizouse, de momento, o pago desas avultadas cifras. Rexeitan unha suba que consideran desorbitada. Séntense indefensos porque carecen de información dos datos cos que se fai o cálculo. Malestar compartido nos concellos que motivou unha xuntanza esta semana da Fegamp. 

Tamén informou o rexedor de Fene doutras reunións e xestións incluídas na súa axenda como o pleno da Mancomunidade celebrada esta semana. Na sesión aprobouse a licitación do servizo de xestión de residuos voluminosos. O contrato sae a licitación por preto de 946.000 euros e cunha duración de tres anos, coa posibilidade de prorrogar por dous máis.