Desde 2009 podemos visitar en Fene un espazo lúdico que fomenta o coñecemento do medio e o imaxinario. Un universo no que cada planeta simboliza algo: as linguas, o humor, as lendas e os seres míticos… Tamén o Po de Estrelas dedicado á Vía Láctea, que guía aos peregrinos. A Galaxia Imaxinaria e o Monumento ao Pallaso están no Parque Castelao. O Monumento ao Pallaso é obra do escultor e ceramista fenés Pérez Porto. Foi impulsado por unha comisión de veciños liderada por Xaquín Marín e inaugurado en 2001 para homenaxear unha das máis fermosas profesións do mundo. O parque Castelao ocupa parte da gran finca de Cela que chegaba ata onde está a oficina de Turismo, na curva do Mercado, porque aí estivo o Mercado municipal. Eses terreos foron cedidos ao Concello para usos públicos. Na propiedade levantábase a casa de veraneo da familia do militar Cela, construída no 1935 sobre unha edificación anterior.