A mobilización, realizada tras unha faixa co lema “Stop touradas”, serviu de anticipo á manifestación que a Plataforma Antitouradas convocou para o día 8 de agosto ás sete da tarde na Praza da Peregrina da cidade do Lérez, coincidindo coa primeira tarde das festas pontevedresas nas que haberá participación de toureiros.

Durante a súa protesta de onte, o colectivo ecoloxista quixo salientar a súa decepción coas políticas do BNG. A Plataforma denunciou a esta forza política á que acusou de “hipócrita” por asumir agora a causa antitaurina cando, durante o seu periodo no goberno autonómico, nada fixo por abolir as touradas. Tamén no eido político, os antitouradas relacionaron a lidia co fascismo –criticaron o alcume de “fiesta nacional”- e cun intento de “imposición españolista” sobre a cultura galega´.