A Marcha polos montes de Brión conmemora a batalla protagonizada neste lugar no ano 1800. Os ferroláns rexeitaron o 25 e o 26 de agosto a invasión das tropas británicas que desembarcaron na praia de Doniños.  No transcurso da batalla os veciños e veciñas de Brión respaldaron aos soldados do destacamento ferrolán.

A marcha deste domingo arrancará do peirao ferrolán en lancha ata San Felipe. Dende alí iráse a pé por San Cristobo, Confurco e Liñares. Ademais da recreación da batalla ao remate celebrarase unha festa para todos os participantes e asistentes.