O partido comezou cunha homenaxe á porteira Uxía Armenteros e cunha pancarta de agradecemento ao Discalzas de Cedeira polo seu comportamento a raíz do golpe que sufriu a xogadora. O Maniños desprazarase o vindeiro domingo a Cedeira para disputar alí o partido aprazado o pasado 22 de xaneiro. Ese día cando apenas se levaban xogado 11 minutos do partido, a porteira do Maniños Uxía Armenteros levou un forte golpe na cabeza nunha acción fortuíta. Quedou sen coñecemento no campo causando un gran susto entre todas as persoas asistentes. Unha médica e unha enfermeira dirixiron os labores de reanimación, antes da chegada dunha ambulancia medicalizada que trasladou á xogadora a un centro hospitalario. Ao final todo quedou nun susto.