“O esforzo que farán é tremendísimo”, analiza o especialista Javier Teijeiro, polo que os fisioterapeutas establecerán un “hospital de campaña” para tratar aos esforzados participantes das procesións. Establecerase na Casa da Xuventude de Viveiro entre o xoves e o sábado. Esta última xornada servirá de recuperación para que os cofrades cheguen nas mellores condicións ás procesións dominicais, xa que moitos deles saen varias veces a transportar as imaxes durante a semana.

O fisioterapeuta que tutela esta iniciativa apunta que os propios capataces das confrarías xa teñen en conta consellos de biomecánica para minimizar os esforzos e realizan unha medida dos levadores co obxecto de distribuir ben os pesos. Ademais, Javier Teijeiro, lembra que o Colexio de Fisioterapeutas repartirá información tamén entre o público asistente ás procesións de Viveiro con consellos para tonificar o corpo e que axudarán a aturar mellor o cansanzo de agardar moito tempo de pé para ver os pasos.