No acto o candidato á alcaldía de Fene polo BNG Juventino Trigo, manifestou a súa vontade de esixir á Xunta de Galicia a construción da segunda galescola na zona de Barallobre e Maniños e a habilitación dun centro de día para a atención de persoas maiores e dependentes. O delegado da CIG no Colexio Terra de Ferrol (antigo Carmen Polo) Adriano Castet, denunciou o empeoramento e encarecemento dos servizos no centro Souto de Leixa para a atención de persoas discapacitadas psíquicas maiores de 21 anos. "A privatización dese centro e a súa entrega á empresa Clece provocou 54 despidos, un deterioro grave no seu funcionamento e o denominado repago, xa que pagamos a través dos impostos para construir edificios públicos, e agora as familias das persoas atendidas no centro teñen que volver a pagar polo comedor e polo transporte, esquencendose do conceito de servizo público" indicou o sindicalista.