Pór en marcha o centro alternativo fóra de Galicia suporía aumentar os custes e reducir as posibilidades de que os traballadores poidan atender aos galegofalantes na súa lingua, argumenta Isabel Moares. Porén, esta non é a única actuación da compañía que non gusta á presidenta do comité de empresa, que denunciou nos micrófonos de Radiofusión que desde que Telemark se fixo coa concesión do 112 Galicia empeoraron a calidade do servizo e as condicións laborais dos empregados.

“Hai que ter en conta que se trata dunha empresa de telemarketing, que nunca xestionara emerxencias, e que prima a produtividade por riba de todo”, asegura. Moares láiase de que a compañía non respecta os acordos conseguidos nos últimos anos e critica a súa práctica de contratar persoas por un ou dous días: “non se pode facer así porque o importante neste traballo é a experiencia”, asegura. Ante esta situación, o comité de empresa anuncia distintas mobilizacións e reclama a mediación da Consellería de Presidencia, departamento do que dependen as emerxencias.

Telemark xestiona o servizo de atención 112 Galicia dende setembro do 2010. Conta con 80 empregados que traballan no centro ubicado en San Marcos (Santiago de Compostela). Segundo denuncia o comité de empresa, a firma non recoñece o aumento salarial pactado coa anterior adxudicataria e aprobado no seu dia pola Xunta de Galicia. 

Máis información no blog da sección sindical da CIG.