Aquilino Alonso e Antonia Montero formaron un matrimonio importante de Fene. A actual rúa da Fraga levou o nome de Aquilino Alonso durante algúns anos. Antonia Montero segue a formar parte do rueiro de Fene. Natural da Pobra do Caramiñal, residente na Coruña e posuidor de Vila Antonia, na finca de Vierna, onde actualmente están as vivendas verdes de Astano, Aquilino Alonso comeza a principios do século XX a preparación dos terreos da ostreira e falece en Perlío, en abril do 33. Foi enterrado no cemiterio parroquial. A Ostreira recibiu a concesión en outubro de 1907 e participou na Exposición Galega celebrada en Santiago dous anos despois. O parque ostrícola media sesenta mil metros cadrados, seis hectáreas, o equivalente a nove campos de fútbol.