O Concello de Fene acollerá este martes 14 de xullo unha xornada de degustación dedicada ás Ostras do Ártabro, unha iniciativa que busca divulgar e poñer en valor este produto do mar a través dunha experiencia gastronómica aberta ao público.

A programación comezará cun acto de benvida institucional no que participarán representantes do Concello de Fene, da Confraría de Pescadores de Barallobre, do GALP Golfo Ártabro Norte e da Consellería do Mar. Presentarase despois o proxecto Ostras do Artábrico, para a promoción deste recurso mariño. A continuación, Paula Patiño (ACastrexa) ofrecerá unha degustación de ostra rizada en conserva e para rematar haberá unha sesión de cociña en vivo a cargo de Nair González, chef do restaurante Muelle 43, que elaborará diferentes propostas culinarias coa ostra como protagonista.

A concelleira de Promoción Económica e Turismo, Ángeles Coira, sinalou que “este tipo de iniciativas contribúen a promover o consumo de produtos de proximidade, apoiar ás confrarías e poñer en valor a riqueza gastronómica do noso territorio”.