Ademais, Pachi Vázquez, secretario xeral do PSdeG desde 2009, confirmou que seguirá traballando "como militante de base" das filas socialistas e que esgotará a lexislatura como deputado "coa máxima lealdade" ao novo equipo.

   A oficialización do que a súa contorna máis próxima xa daba por feito chega tras finalizar, como comprometera, a presentación da consulta ante representantes das distintas agrupacións do catro provincias galegas e nunha semana na que o aspirante lucense, José Manuel Gómez Besteiro, sumou importantes apoios para os seus obxectivos.

   Ademais do foro Novo Socialismo Galego, que aglutina boa parte dos máis críticos coa xestión política do actual secretario xeral do PSdeG, os exministros Francisco Caamaño e José Blanco descartaron presentarse e fixeron público que Besteiro terá o seu apoio. Vázquez, con todo, restou transcendencia a estes apoios e negou que influísen na súa decisión, adoptada "desde hai meses".

   O outro dirixente que, polo momento, deu un paso adiante e anunciou a súa intención de tentar solicitar os máis de 1.000 avais da militancia esixidos para poder concorrer ás primarias de setembro é o alcalde da Illa de Arousa, Manel Vázquez, que até o momento mostrouse publicamente remiso aos "pactos".