Todo listo nas cociñas dos locais participantes no certame de Tapas como puidemos comprobar esta mañá en Radio Fene. Fixemos un percorrido polos establecementos participantes a ver como levan os preparativos e para que nos deran un adianto sobre as súas propostas. O Amarizaflor compite cunha tapa que leva o mesmo nome do local. No Arrecendo apostan pola súa Explosión de Carrillada. Na Cantina da Asociación Veciñal de Limodre poderemos saborear o Taco do mar. Coa súa Tosta de carne e pasas compite o Bombay. Caprese do corral é a proposta coa que nos seducen no Lembranza. O Son de Cociña alumearanos co seu Faro do Son. Desde o Pachamama contaron como é a súa tapa de nome contundente, Cojonudo Pachamama. 

Ademais de gozar das propostas gastronómicas, a clientela poderá participar na ruta de tapas (FENERRUTA) e optar a diferentes premios mediante votación, incentivando así a participación e o percorrido polos distintos locais. E os establecementos optarán aos galardóns ás mellores tapas concedidos pola clientela e por un xurado profesional.