O Centro de Interpretación de Caldoval mostra desde 2014 parte dos achados da época romana que saíron á luz ao facer as obras de construción da regasificadora, lembrou Estefanía Purriños. Atopouse daquela un importante xacemento, unha posible Vila Romana do século I d. C con baños domésticos. Pedra a pedra foron trasladadas 12.500 pezas para reconstruír e musealizar Balneum doméstico, o baño, e a Palestra, a zona de ximnasio. Os restos arqueolóxicos do Museo están situados aproximadamente na mesma cota na que estaban na súa orixe, á que accedemos mediante unha rampla descendente. A especialista en Turismo aconsella unha visita a este museo que ofrece de balde a posibilidade de coñecer un anaco da nosa Historia e tamén ten un programa de actividades e obradoiros para nenos e nenas.