A Confraría de Pescadores de Barallobre comercializará directamente as capturas de peixe a partir do día 17 de abril. Nesa data vai inaugurar a súa propia peixería. Estes días a Confraría ten outra noticia positiva, porque finalizou con resultados positivos a actuación de sementa de ostra plana no marco do proxecto “Rexeneración de Bancos Naturais de Ostra Plana” financiado por fondos europeos.

O patrón maior tamén fixo balance das campañas de marisqueo da navalla e o ourizo e da realizada na ría de Sada e falou da situación da vieira, que non se pode capturar de momento polos altos niveis de toxina detectados nas analíticas. Detallou ademais os proxectos previstos para mellorar as infraestruturas da Confraría Santiago Apóstolo.