Unha das asistentes identificou con emoción á súa nai nunha das películas proxectadas. Manolo González foi impulsor e director da Escola de Imaxe e Son da Coruña (1990-1998) e da Axencia Audiovisual Galega (2005-2009). Coordina desde 2014 o Chanfainalab en San Sadurniño. Ven de publicar en Editorial Embora O cineista andarengo. A propósito de Bernardino de Lamas, unha biografía na que relata a peripecia vital do precursor do cinema documental en Galicia. Filmou arredor de trescentas películas de un minuto e medio de duración entre 1924 e 1935 sobre festas e paisaxes de Galicia. Ademais logrou unir ao pobo de Barallobre para erguer o Monumento ao Camiñante Descoñecido, lugar de reivindicación da natureza e da cultura. 
Romaría do Monumento ao Camiñante Descoñecido
O Monumento inaugurouse o 1 de xullo de 1934. Neste sábado, cinco de xullo, celébrase ao longo de todo o día a romaría conmemorativa. As cinco da tarde sairá do campo da festa unha camiñada ata o Monumento, onde haberá intervencións. Un completo programa de actividades encherá a xornada.