“Estamos no momento de deseñar os futuros servizos sociais de Fene, hai un cambio xeracional no departamento, e hai que planificar o futuro”, apunta o concelleiro de Benestar Social que destaca a necesidade de ter en conta o avellentamento da poboación. “Hai un problema bastante grande na atención aos maiores”, sinala o concelleiro. Tamén apunta a necesidade de ver como xestionar a integración das persoas inmigrantes. “Hai que estar aos cambios sociais”, sinala. Lamenta a falta de apoio da Xunta. “É un lastre, temos un problema de financiamento porque temos unha Xunta rácana; son propagandistas insensibles, as necesidades das persoas non lles importan”.

“A dependencia é un dos servizos moi demandados, as necesidades de apoio nos domicilios quizais o máis demandado e a tramitación segue sendo complicada”, explicou Pilar Couce. Antes da modificación da tramitación decidida pola Xunta, os servizos sociais municipais tiñan maior papel no procedemento. E non se cumpriu o obxectivo de reducir os tempos. “Non é o mellor procedemento, aínda que para nós é menos traballo, as persoas poden facelo nunha xestoría ou pola súa conta, sen coñecer os recursos existente, iso produce un atasco”, advertiu a coordinadora do departamento municipal de Benestar.