Partindo da situación da filosofía desenvolverase unha reflexión máis xeral sobre que significa e como funcionan os grupos culturais e lingüísticos minoritarios na súa interacción coas correntes e linguas predominantes. As cuestións que se porán sobre a mesa deberán iniciar un debate que, partindo da discusión técnica acerca da filosofía como ámbito do saber específico, permita pensar as problemáticas ás que se enfrontan toda cultura e todo grupo social minorizados. 

A conferencia inaugural pronunciouna Paula Godinho, da Universidade Nova de Lisboa, coa intervención ‘O celtismo, entre políticas de identidade e prácticas da cultura’. Seguiulle un obradoiro dedicado a ‘Filosofía dentro e fóra da institución’ para a presentación de proxectos autónomos de pensamento en galego. O conxunto de relatorios deste tres días de congresos organízanse arredor de sete mesas redondas temáticas que abordan cuestións relacionadas coa comunidade, periferia, colonialismo cultural, empoderamento, subalternidade, minoría e precariedade.