Lobeira asegura que polo ben da saúde das persoas que participaron no dispositivo de limpeza, “cómpre tomar medidas que minimicen o impacto ou risco sobre elas”.

O parlamentario do BNG suxire a elaboración dun estudo sanitario coa fin de determinar as secuelas físicas que presentan os mariñeiros, bateeiros, percebeiros e outras persoas que realizaron labores de limpeza, así como articular compensacións económicas para aqueles afectados pola exposición á marea negra do ‘Prestige’.

Consecuencias do Prestige

Os investigadores detectaron que os pescadores que no seu día participaron na limpeza da vertedura presentan máis síntomas respiratorios (tose, flemas e inflamacións das vías aéreas) que aqueles que non estiveron en contacto co fuel. Outro dos cambios constatados é que o grupo que recolleu o cru ten máis alteracións nos cromosomas das células sanguíneas. «É moi importante remarcar que no estudo non se falan de ningunha enfermidade, senón que o que detectamos son unha serie de cambios biolóxicos que poden dar lugar a unha maior predisposición a desenvolver enfermidades», entre as que se inclúe o cancro, puntualizou esta semana o doutor Joan Albert Barberà, neumólogo do Hospital Clínic de Barcelona e codirector da investigación impulsada pola Sociedade Española de Pneumoloxía (Separ), na que tamén participaron equipos médicos de centros sanitarios de Madrid e A Coruña.