Un "gol pantasma" que cambiou o guión

O equipo saíu moi concentrado, cunha intensidade defensiva que maniatou a un Val que buscou máis o fútbol directo que o xogo combinativo. Porén, a polémica estalou xa case ao remate da primeira metade. Tras unha gran intervención de Mario a un saque de esquina, o linier validou un "gol pantasma" que, segundo o técnico e incluso afeccionados visitantes, non chegou a traspasar a liña de meta. "Fúmonos 0-1 ao descanso coa sensación de que o gol non era merecido", explicou Mesa. A decisión do xuiz de liña provocou a protesta do numeroso público que acudiu ao partido.

A resistencia con nove xogadores

A segunda parte seguiu o mesmo guión de entrega ata que chegaron as expulsións. Primeiro Óscar, nunha xogada moi discutida onde o técnico reclamou unha falta previa, e pouco despois Borja con vermella directa, deixaron ao Barallobre con nove homes xusto cando se preparaban os cambios para buscar o empate.

Malia a inferioridade numérica, o Barallobre non lle perdeu a cara ao partido e incluso tivo unha ocasión clarísima nos pés de Agustín para igualar a contenda. Non foi ata os últimos cinco minutos, co equipo totalmente envorcado, cando O Val logrou sentenciar con dous goles máis.

Orgullo e mirada posta no Perlío

Ao remate, Borja Mesa quixo destacar o comportamento dos seus: "Estou moi contento pola actitude do equipo e polo apoio da afección, que non deixou de animar dende a grada". O adestrador lamentou que o partido quedase condicionado: "O Val non precisa este tipo de axudas para gañarnos".

O Barallobre pecha xa a carpeta da Copa e céntrase no importante duelo de liga deste domingo contra o Perlío B, co obxectivo de recuperar a dinámica de vitorias e sumar tres puntos fundamentais.