Presentará a homenaxe o actor e monologuista Carlos Blanco. A seguir intervirán numerosos artistas de Galicia e Portugal, encabezados pola cantautora Uxía, que ademais coordina o evento. Daquela, subirán ao escenario do Principal os galegos Antón Seoane, Miro Casabella, Fran Pérez ‘Narf’, Mini e Mero, a Orchestra Valdeorras e Quintas Canella, así como os portugueses Manuel Freire, Francisco Fanhais e João Afonso.

Como se indicou, a entrada será libre ata completar a capacidade. Con todo, o público poderá colaborar economicamente coa organización do evento adquirindo un exemplar do libro-CD con que se homenaxea a Benedicto.

Mestre, cautautor, sindicalista, militante

A comisión organizadora da homenaxe destaca o carácter polifacético de Benedicto. Na súa persoa conflúen o «mestre comprometido coa renovación pedagóxica» mais o «home militante de partido», pero tamén o cantautor social «comprometido coa liberdade e a cultura galega» ou o sindicalista, labor este último que desempeñou no Sindicato Galego da Música, na Federación do Ensino e na dirección nacional de CC OO de Galicia.