O Concello de Fene, a través da área de Medio Ambiente, comezou esta semana os traballos de limpeza do Río Cádavo no seu tramo urbano, desde o entorno do consistorio até Perlío, co obxectivo de minimizar o risco de inundacións. As tarefas inclúen a eliminación de lodos e pólas depositadas na canle do río. Contan cun investimento de aproximadamente 8.000 €. Medio Ambiente tamén iniciou os traballos de poda de árbores na Avenida Naturais e na Marqués de Figueroa, unha actuación que ronda os 15.000 €.

O alcalde de Fene, Juventino Trigo destacou que esta limpeza “enmárcase dentro dos esforzos do goberno local para previr as consecuencias das fortes choivas”, e lembrou a recente compra e limpeza dunha parcela en Perlío que supuña un dos maiores obstáculos para o paso da auga no río. Pola súa parte, María del Carmen Martínez, subliñou a importancia de manter os espazos verdes coidados. “A poda das árbores non só mellora a estética das nosas avenidas, tamén prevén posíbeis problemas derivados da caída de pólas en época de choivas”, explicou a concelleira.