A visita da rondalla do Club de Campo de Ferrol na tarde do domingo oito de xaneiro puxo o broche de ouro á programa de Nadal organizada pola Agrupación Instrutiva de Caamouco. O Concerto de Ano Novo contou cunha elevada participación, con preto dun cento de asistentes, malia as adversidades meteorolóxicas da xornada. A actuación arrancou cunha homenaxe á madriña da rondalla, á quen a Agrupación agasallou cun ramo de flores. Durante o concerto, a agrupación musical ofreceu unha variada escolma de boleros ou habaneras, arroupados por un público que se sumou a cantar ao longo de toda a actuación. Co Concerto de Ano Novo, a Agrupación Instrutiva de Caamouco pon o punto e final á súa programación de Nadal. Un conxunto de actividades que, de novo, volveron contar co apoio de toda a veciñanza. Entre os actos, dende a Xunta Directiva salientan a primeira edición do Merca Talento, un mercado de Nadal que achegou a Caamouco as creacións de artesáns e emprendedores da comarca. Ao mesmo tempo, dende a Agrupación salientan as distintas actividades infantís organizadas ao longo do Nadal, con dous obradoiros que mesmo superaron o máximo de participación. Ademais, a terceira edición do Concurso de Postais de Nadal deixa tamén moi bo sabor de boca con récord de participación.