Durante a xornada tamén se proxectará un vídeo promocional, no que se recollen imaxes destas festas e actividades culturais, así como referencias ao turismo gastronómico —coa Confraría de Barallobre como protagonista—, a creación artística local, representada por Laudas Calamity, ou a música tradicional galega, con Airiños de Fene.

A concelleira de Promoción Económica e Turismo, Ángeles Coira, destacou que “esta feira é unha oportunidade excelente para amosar todo o que Fene ten para ofrecer, desde os nosos festivais e tradicións ata o potencial creativo e gastronómico que nos distingue”. “Queremos que a xente saiba que Fene é un destino que combina cultura, natureza, sabor e memoria, e que aposta por un turismo sostible e de calidade”, engadiu.

A feira contará, ademais, cunha ampla programación de actividades culturais e gastronómicas, mercado de artesanía, obradoiros para crianzas e actuacións musicais, convertendo o espazo do Parque da Rúa nun punto de encontro para descubrir a diversidade dos concellos do Camiño Inglés.

Coa participación neste evento, o Concello de Fene reafirma o seu compromiso coa promoción do concello como parte activa da rede do Camiño Inglés e como destino de referencia no eido cultural e turístico da comarca. Tamén participarán na xornada os restantes Concellos atravesados polo camiño inglés a Santiago de Compostela. 

Na imaxe Laura Bouza do laboratorio de criación artística Laudas Calamity, unha das iniciativas de Fene que se amosará na feira este sábado en Miño

Fotografía Xan Xe