“Hai sociólogos que ven inviable substituír a un profesor por unha pantalla porque a súa función é transformadora”, lembra Barcia. Por iso, recomenda aos docentes “actualizarse e buscar maneiras para que os contidos cheguen ao alumnado”. Os docentes deben facer un esforzo para adaptarse aos cambios que xa están aquí. Actualización necesaria para evitar o risco do que alerta Bill Gates. O gurú das novas tecnoloxías ten advertido de que algúns profesores de secundaria acostumados a actuar so como meros transmisores de información poderían chegar a ser substituídos por un “holograma ou un vídeo”. O problema pode aparecer “cando o profesor ve un inimigo na tecnoloxía ou o ego lle impide recoñecer que necesita actualizarse”.