PSdeG: “Sae máis cara a tramitación administrativa que a subvención do seguro de accidentes establecido pola Xunta”

PSdeG: “Sae máis cara a tramitación administrativa que a subvención do seguro de accidentes establecido pola Xunta”

29 de Xuño, 2011 - 12:00 h. | Publicada por Radio Fene

A portavoz de Pesca do Grupo Parlamentario dos Socialistas de Galicia, Marisol Soneira interveu hoxe no Pleno da Cámara para reclamar á Xunta, mediante unha moción, que recupere o seguro colectivo de accidentes no mar. A iniciativa foi rexeitada polo PP. A responsable socialista criticou que o Goberno de Feijóo deixou “absolutamente desprotexidos” a 30.000 traballadores do mar dende a retirada do seguro no pasado mes de outubro.

Soneira denunciou que “sae mais caro a tramitación administrativa que a subvención que concede o seguro de accidentes que se sacou da chisteira a Consellería do Mar”. Afirma que para que un mariscador ou mariscadora a pe poida acceder a esta subvención “terá que aportar ate doce documentos distintos e aínda así, non terá garantida a misérrima subvención de 25€ euros anuais”, replicou.

Advirte que a Consellería do Mar substitúe o Seguro Colectivo de Accidentes no Mar, “totalmente gratuíto para o conxunto das persoas que traballan no mar, por unha subvención que concederá, no mellor dos casos, 25€ aos mariscadores a pe despois dun longo, complexo e caro trámite administrativo”, proclamou.

Institucional