Brenntag, como responsable solidaria e subsidiaria, debería sufragar as compensacións derivadas do accidente contaminante, respondendo polos tres traballadores aos que se acusa como autores dun delito contra os recursos naturais e o medio ambiente por omisión e imprudencia grave. Para eses empregados, nos que se carga o incendio e posterior destrución da factoría de químicos, pídense catro meses e 15 días de prisión, ademais da indemnización, que asumiría a empresa.

A maior parte deses 10 millóns de euros compensarían ao Goberno da Xunta por todos os traballos que tivo que facer para controlar os estragos e devolver a normalidade ao río e a súa contorna. O conselleiro de Medio Ambiente, Agustín Hernández, declarou hoxe a súa total conformidade coa reclamación á empresa.