“Para o Concello non é sostible”, denuncia o concelleiro de Benestar. Manuel Polo lembra que o BNG defende que este servizo debera ser autonómico. Un modelo de xestión máis amplo facilitaría a dotación de persoal e medios para atender as persoas nos seus domicilios. “Concello a concello o único que conseguimos é atomizar e precarizar o servizo”, explica. Sinala tamén o responsable municipal de Benestar a necesidade de planificar a atención ás persoas maiores nunha sociedade cada vez máis envellecida como é a galega. “Fene xa ten máis de 50 anos de media, a pirámide da poboación é moi estreitiña por abaixo”, apunta. 

Máis de cento cincuenta persoas son usuarias do Servizo de Axuda no Fogar do Concello de Fene. E hai noventa en lista de agarda, nalgúns casos xa son usuarias pero aumentou o seu grao de dependencia e precisan máis tempo de axuda. A nova concesionaria do Servizo de Axuda no Fogar comezou traballar recentemente. O Concello de Fene adxudicou o servizo por un ano prorrogable por outro ano por un importe anual de 1,5 millóns de euros.  O custe dunha hora de servizo é de 21 euros. A Xunta só aporta 12, o que obriga aos concellos a asumir a maior parte do custe real: 9 € adicionais por hora e o propio persoal municipal que se dedica a xestionar e supervisar o servizo.