O Poder Xudicial debe garantir aos cidadáns o dereito a que nos protexa a Xustiza, explicou a avogada. “Que todos, independentemente das condicións, teñamos acceso á Xustiza e poidamos defender os nosos intereses”. O Consello Xeral do Poder Xudicial é o órgano de goberno dos xuíces e maxistrados. Del dependen nomeamentos, organización e réxime disciplinario da carreira xudicial. Está formado por 20 vogais, 10 elixidos polo Congreso dos deputados e outros 10 polo Senado, entre xuíces e xuristas de recoñecida competencia.

Logo de dúas xuntanzas infrutuosas, o pleno do renovado Consello Xeral do Poder Xudicial volve reunirse o luns para tratar de elixir un presidente. Nesa figura recae tamén a presidencia do Tribunal Supremo.  Aínda que son elixidos polas Cortes, “nin o presidente nin os membros deben ser influenciados, teñen que ter independencia”, remarcou María. Iso, polo menos, é o que di a Lei.