Segundo os datos achegados pola familia, as vítimas foron executadas en diferentes localizacións da comarca: Emilio foi asasinado ante o cemiterio de Maniños (Fene), Ricardo fronte ao cemiterio de Laraxe (Cabanas) e Andrés en Ferrol. A día de hoxe, búscase luz sobre o lugar exacto onde foron depositados os seus restos mortais.

Unha familia golpeada pola represión

A historia céntrase na liñaxe de Andrés Iglesias Garrote, quen no momento do seu asasinato tiña arredor de 60 anos e era tenente xubilado de Infantería de Mariña. Andrés contaba cunha longa traxectoria militar: ingresou no corpo en 1896, estivo destinado en Cuba e Filipinas, navegou por Marrocos e formou parte da Garda de Arsenais en Ferrol, onde chegou a recibir felicitacións oficiais e a asumir o mando de pelotóns. Tras retirarse antes dos anos 20, estableceuse en Fene xunto coa súa muller e os seus sete fillos (cinco homes e dúas mulleres).A represión cebouse con este núcleo familiar de xeito dramático:

Andrés Iglesias Garrote: Asasinado en Ferrol e en paradoiro descoñecido.

Emilio Iglesias: Fillo de Andrés, asasinado ante o cemiterio de Maniños e que aínda consta como desaparecido.

Ricardo Echevarría: Xenro de Andrés (marido da súa filla Carmen Iglesias), executado diante do cemiterio de Laraxe e tamén desaparecido.O resto dos fillos de Andrés viviron camiños diversos marcados polo contexto da época. Outro dos xenros, o tenente José Torres Santiso morreu o 22 de febreiro de 1949 a mans da guerrilla en Xuvia. Pola súa parte, dous dos fillos varóns traballaron en Astano ou embarcados; un deles fuxiu cara aos Estados Unidos cando estalou o conflito, acabando os seus días en Asturias, mentres que outro irmán, ao que tamén se daba por desaparecido, puido localizarse recentemente grazas a uns datos que confirman que faleceu nos anos 90 en Barcelona. Con este proceso de recoñecemento xudicial, a familia busca non só dignificar a memoria de Andrés, Emilio e Ricardo, senón tamén obter respostas oficiais que axuden a pechar unha ferida que dura xa case un século.

Na imaxe, fotografía de Emilio Iglesias Fernández, asasinado diante do cemiterio de Maniños.