O capítulo máis cruento da loita polos dereitos da muller produciuse, con todo, o 25 de marzo de 1911, cando se incendiou a fábrica de camisas Shirtwaist de Nova York. Un total de 123 mulleres e 23 homes morreron. A maioría eran inmigrantes que tiñan entre 14 e 23 anos. Foi o desastre industrial máis mortífero da historia da cidade e supuxo a introdución de novas normas de seguridade e saúde laboral en EEUU.  Segundo o informe dos bombeiros, unha cabicha mal apagada tirada nun cubo de restos de tea que non se baleirou en dous meses foi a orixe do incendio. Os traballadores non puideron escapar porque os responsables da fábrica pecharan todas as portas de escaleiras e das saídas, unha práctica habitual entón para evitar roubos. A ONU declarou en 1975, o 8 de marzo como Dia Internacional da Muller, a data que hoxe se conmemora cunha folga laboral, de coidados e de consumo.