En marcha un proxecto de investigación sobre a zamburiña. O fin é elaborar un plan de manexo específico para as poboacións da especie na ría que alberga actualmente o único banco natural explotable de zamburiña en Galicia, o que a converte nun enclave estratéxico tanto desde o punto de vista ecolóxico como socioeconómico. O proxecto xorde nun momento especialmente delicado para a especie. Porque tras varios anos de estabilidade nas capturas, en 2024 rexistrouse un episodio de elevada mortalidade que reduciu drasticamente a poboación,poñendo en risco a súa viabilidade futura e a continuidade da actividade extractiva asociada. O Instituto de Investigacións Mariñas do Consello Superior de Investigacións Científicas levará a cabo este estudo durante dous anos na ría, en colaboración coas confrarías de pescadores de Barallobre, Ferrol e Mugardos.