“Google naceu coa idea de organizar o caos que era internet e conseguiu facelo dunha maneira nunca antes vista”, sinalou Iago Varela. Google, a multinacional da tecnoloxía, que se estende por todo o mundo, naceu hai 26 anos nun garaxe de California, froito do traballo de dous estudantes de informática. So seis anos despois a empresa xa cotizaba en Bolsa. Hoxe Google está presente de moitas maneiras nas nosas vidas, a través do buscador de internet, pero tamén de Gmail, Youtube, Google Maps ou Android, por mencionar so algunhas das ferramentas das que nos valemos a diario. Android, por exemplo, supuxo “unha peza clave na popularización dos smartphones, máis do 80% dos teléfonos que se venden no mundo teñen este sistema operativo”. O respecto da privacidade e as prácticas monopolísticas son os dous reproches que se lle fan usualmente a esta gran empresa que revolucionou o acceso á información, a maneira de traballar e tamén o noso ocio.