Con motivo do Rallye de Ferrol, o equipo formado por Édgar Vigo e Fátima Ameneiro, comezarán un dos retos que se propuxeron neste 2019. Despois de competir en terra e asfalto, dentro do Supercampeonato de España de Rallyes, a puntuabilidade do Rallye de Ferrol para o Tour European Rallye (TER Series) puxo, desde principio de ano, o punto de atención dos deportistas feneses neste campionato continental. Ferrol será a primeira cita para Édgar e Fátima dun campionato no que, en caso de obter un bo resultado, continuarán por terras de Rumania, Bélxica e Suíza.

O Rallye de Ferrol, no seu 50 aniversario, é unha cita coa historia que os de Scratch Fene non se podían perder. Será un rallye, como de costume, complicado. Nesta ocasión, o equipo contará cun Peugeot 208 R2 da estrutura ferrolá de TRS co número 14 nas súas portas. O equipo espera ter máis sorte que cos anteriores Peugeot que probaron nesta tempada porque só nunha ocasión non sufriron unha avaría mecánica. Coa puntuabilidade das TER Series, o equipo espera volver á senda do éxito e recuperarse de tantos problemas.