A dispor xudicial unha persoa acusada dun delito continuado de sabotaxe na vía do tren en Ortigueira. A Garda Civil dá por esclarecidos sete episodios cometidos entre xuño e agosto na parroquia de Senra, en Ortigueira, onde apareceron na vía en varias ocasións obstáculos de gran tamaño como bloques de formigón ou troncos e nunha ocasión, no mes de xuño, chegou a tallar un piñeiro de grandes dimensións para provocar a caída da árbore sobre a vía. Os feitos que se lle imputan supuxeron un grave risco para a seguridade do tráfico ferroviario e a integridade das persoas viaxeiras, obrigando en repetidas ocasións á interrupción temporal do servizo, á mobilización de persoal técnico para o despexe da vía e á conseguinte alteración dos horarios habituais. As dilixencias instruídas pola Garda Civil foron postas ao dispor do Tribunal de Instancia de Ortigueira.