“A doazón xa non é un tema tabú”, indicou a Radio Fene o presidente de Alcer Coruña, Rafael Rodríguez. O nivel de doazóns en Galicia é cada vez maior. Oito de cada dez familias de persoas falecidas din que si. Tamén é máis frecuente que a persoa deixe manifestada a súa vontade de doar. “Medra a cifra de persoas dispostas a doar, pero á primeira dificultade é atopar quen poida facelo”. So unha de cada cen persoas que morren no hospital poden ser doadores de órganos, explicou. Na Área Sanitaria de Ferrol realízanse unha media de dúas doazóns ó ano, e días como o de hoxe, serven para dar as grazas aos doadores e recordar a importancia de doar órganos. Nesta Área, a media de doazóns está en dúas anuais, pero con esas dúas doazóns pódense salvar ou mellorar entre 16 e 20 vidas.