Sandra Permui, a actual alcaldesa, primeira muller á fronte do Concello de Fene, simboliza a renovación xeracional dun proxecto que vén consolidándose no tempo, e onde o compromiso coa veciñanza e unha traxectoria ligada á realidade social e industrial do municipio son eixos do traballo do día a día, din na formación nacionalista. Sinalan que a elección Permui como candidata á alcaldía nas próximas eleccións municipais é unha decisión que reforza a continuidade dun proxecto político centrado na transformación do concello, a mellora dos servizos públicos e a proximidade coa veciñanza.

Desde a organización nacionalista salientan a “ilusión e responsabilidade” coa que afrontan esta nova etapa, apostando por consolidar o traballo desenvolvido nos últimos anos e seguir avanzando nun modelo de concello participativo e cohesionado socialmente, pegadas indispensábeis dun goberno BNG.

O BNG pon en valor a traxectoria de Sandra Permui, actual alcaldesa de Fene e primeira muller en ocupar este cargo, destacando a súa experiencia en diferentes áreas de goberno, a súa capacidade de xestión e o seu coñecemento profundo da realidade local. Subliñan ademais o seu compromiso coa igualdade como eixo transversal da acción municipal, impulsando políticas que avanzan cara un concello máis xusto e inclusivo.