O presidente da entidade, Víctor Domínguez e Mónica Paz, a súa vice presidenta, salientan que o proxecto de creación do novo equipo vai por bo camiño porque contan xa con ao redor de 11 rapaces e rapazas interesados en xogar no Ramo.

A entidade, aínda estando en período vacacional, segue traballando para formar este equipo de base que era un dos obxectivos marcados cando asumiron a xunta directiva da Sociedade Deportiva, consideran que traballar dende a base axudará a sustentar o futuro da entidade. 

O convite a aquelas rapazas e rapaces que queiran xogar no Ramo está aberto. Calculan dende a entidade, que durante o mes de xullo manterán aberta a posibilidade de unirse ao club e conseguir acadar o número de xogadores e xogadoras preciso para poñer en marcha o equipo.

Ao tempo a SD Barallobre segue reforzando tanto o equipo de modestos como o corpo técnico de Borja Mesa e as necesarias melloras das instalacións deportivas do Ramo, como a construción dunhas bancadas ou a preparación e pintado do valo perimetral do campo.

Un proxecto deportivo que non para e quere seguir medrando.

Fotografía: XanXe