O Concello de Fene vén de adxudicar o novo contrato do Servizo de Axuda no Fogar, coñecido como SAF á empresa Osventos Innovación en Servizos, por un período dun ano prorrogable por outro máis por un importe de 1.449.203 euros. O contrato garante a prestación integral do servizo, baixo a dirección e control público da Área de Benestar Social e do departamento municipal de Servizos Sociais.

A Axuda no Fogar prestarase de luns a domingo, incluídos os días festivos, entre as sete e as dez. Establécense dous tipos de servizo: o común, de luns a sábado, e o servizo extraordinario para domingos e festivos. Trátase dun recurso esencial dirixido a garantir que as persoas maiores ou en situación de dependencia poidan permanecer nos seus fogares con seguridade, dignidade e autonomía. A empresa deberá contar, como mínimo, con dúas persoas coordinadoras traballadoras sociais a xornada completa e con dedicación exclusiva ao Concello de Fene, así como cun auxiliar de coordinación destinado á oficina municipal. Cun plantel de 47 auxiliares, o contrato garante a estabilidade do persoal nos domicilios das persoas usuarias e o cumprimento estrito da normativa laboral, de protección de datos e de prevención de riscos laborais. O contrato inclúe tamén o préstamo de axudas técnicas, como camas articuladas, grúas, sillóns xeriátricos, cadeiras de rodas, andadores e outros elementos necesarios para a correcta atención no fogar.

Para a alcaldesa, Sandra Permuy, “o Servizo de Axuda no Fogar é un piar básico do sistema de coidados, porque permite ás persoas maiores ou dependentes seguir vivindo nas súas casas, no seu entorno, con seguridade e dignidade”. Porén, advertiu de que “o financiamento actual por parte da Xunta non responde ás necesidades reais do servizo”. O custe dunha hora de servizo é de 21 euros. A Xunta só aporta 12, o que obriga aos concellos a asumir a maior parte do custe real: 9 € adicionais por hora e o propio persoal municipal que se dedica a xestionar e supervisar o servizo.