“Falta transparencia”, sinala Iago Varela. A empresa anuncia que traballa nun proxecto interesante, crear identidade dixital universal a través do escaneo do iris, permitindo a todas persoas contar cunha forma segura para identificarse. “Hai preocupación sobre como se van usar eses datos no futuro, o iris é un elemento único, máis seguro que as pegadas dixitais, pode derivar en discriminación por parte das empresas”, explica Iago. Esas dúbidas sobre o uso e a seguridade dun dato biométrico que nos distingue a cada un de nós levaron a intervir á Axencia Española de Protección de Datos. Ordenou a suspensión temporal do proxecto mentres investigan se cumpre coa normativa de protección de datos. “A principal preocupación é que eses datos recompilados poidan empregarse en fins sen consentimento das persoas, tamén se lle impuxo multa de 300.000 euros por incumprimento da normativa por non ter obtido o consentimento explícito dos usuarios para obter eses datos biométricos”.