O Laboratorio de Creación Artística Laudas Calamity, aberto en Fene hai dez anos por Laura Bouza, culmina o curso escolar con unha exposición na que podemos observar como se desenvolve o proceso de aprendizaxe artística. A mostra reúne unha selección de exercicios realizados polo alumnado durante este curso. Amósanse obras realizadas con distintas técnicas como pintura ao temple, debuxo, escultura ou gravado. Expoñen tamén papeliños con notas das frases nas que máis se insistiu durante todo o curso. “Sen censura ningunha”, bromea Laura Bouza, artista que foi quen de poñer en pé e soster durante todos estes anos en Fene o Laboratorio de Creación Artística Laudas Calamity. “Cando empecei había quen preguntaba se era unha perruquería ou unha florería”. 

A VI Mostra de Alumnos Laudas Calamity poderá visitarse na sala de exposicións temporais da Casa da Cultura de Fene até o vindeiro 12 de xuño, en horario: de luns a venres, de 10.00 a 13.00 horas e de 16.00 a 21.00 horas, e os sábados, de 10.00 a 13.00 horas.