“Animo a solicitalo, é un servizo marabilloso, dá resposta de xeito inmediato aos usuarios cando o precisan”, manifestou a traballadora social. No concello de Fene hai actualmente 153 persoas que contan con este dispositivo, un botón que se pode colgar do pescozo ou poñer como un reloxo e que permite dar aviso no caso dunha caída ou de calquera problema que sufra o usuario. Para solicitalo hai que acudir aos servizos sociais do Concello. En Fene a maioría das persoas que fan uso do programa de Teleasistencia son mulleres maiores de 65 anos. Moita xente sabe da existencia deste recurso pero non cae na conta de que pode valerse del. “Atopamos moita xente que veñen pedir outra axuda e nós aconsellámoslles que o soliciten”.