“Quero facer un chamamento á conciencia da xente”, dixo en Radio Fene a concelleira de Medio Ambiente que lamentou os casos de maltrato animal rexistrados recentemente no concello. Animou á cidadanía a colaborar denunciando cando teña constancia dalgún deses feitos. “Non é obrigatorio ter un can, quen o teña debe darlle os coidados necesarios porque é un ser vivo”. A concelleira lembrou que as sancións por non coidar debidamente aos animais son elevadas.  Dez mil euros é a multa por non ter chip. 

Verquidos ilegais

Verquidos ilegais de rodas, botes de pintura e uralitas é outro problema medio ambiental. Reiteradamente aparecen en distintos puntos do concello de Fene, como as parroquias de Maniños e Sillobre. “Os verquidos fanse de noite, é lamentable a falta de civismo”, apunta a concelleira que destaca o custe para o Concello de retirar eses residuos que non parecen proceder de particulares.  “A persoa que se colla facéndoo que saiba que non me vai tremer o pulso coa sanción, con iso e no tema dos cans”.